kitni hi barishen hon shikayat zara nahin

kitnī hī bārisheñ hoñ shikāyat zarā nahīñ

sailāniyoñ ko ḳhatra-e-sail-e-balā nahīñ

maiñ ne bhī ek harf bahut zor se kahā

vo shor thā magar ki kisī ne sunā nahīñ

lākhoñ hī baar bujh ke jalā dard kā diyā

so ek baar aur bujhā phir jalā nahīñ

vaise to yaar maiñ bhī taġhayyur-pasand huuñ

chhoTā sā ek ḳhvāb mujhe bhūltā nahīñ

sote haiñ sab murād kā sūraj liye hue

rātoñ ko ab ye shahr duā māñgtā nahīñ

us din havā-e-sub.h ye kahtī huī ga.ī

yūsuf-miyāñ ke sāñvle beTe meñ kyā nahīñ

kitni hi barishen hon shikayat zara nahin

sailaniyon ko KHatra-e-sail-e-bala nahin

main ne bhi ek harf bahut zor se kaha

wo shor tha magar ki kisi ne suna nahin

lakhon hi bar bujh ke jala dard ka diya

so ek bar aur bujha phir jala nahin

waise to yar main bhi taghayyur-pasand hun

chhoTa sa ek KHwab mujhe bhulta nahin

sote hain sab murad ka suraj liye hue

raaton ko ab ye shahr dua mangta nahin

us din hawa-e-subh ye kahti hui gai

yusuf-miyan ke sanwle beTe mein kya nahin