kitni hi be-zarar sahi teri KHarabiyan

kitnī hī be-zarar sahī terī ḳharābiyāñ

'bāsir' ḳharābiyāñ to haiñ phir bhī ḳharābiyāñ

hālat jagah badalne se badlī nahīñ mirī

hotī haiñ har jagah kī kuchh apnī ḳharābiyāñ

tū chāhtā hai apnī na.ī ḳhūbiyoñ kī daad

mujh ko aziiz terī purānī ḳharābiyāñ

jūñhī ta.alluqāt kisī se hue ḳharāb

saare jahāñ kī us meñ mileñgī ḳharābiyāñ

sarkār kā hai apnā hī me.ār-e-intiḳhāb

yaaro kahāñ kī ḳhūbiyāñ kaisī ḳharābiyāñ

aadam ḳhatā kā putlā hai gar maan leñ ye baat

nikleñgī is ḳharābī se kitnī ḳharābiyāñ

un hastiyoñ kī raah pe dekheñge chal ke ham

jin meñ na thiiñ kisī bhī tarah kī ḳharābiyāñ

bo.eñge apne baaġh meñ sab ḳhūbiyoñ ke biij

jaḌ se ukhāḌ pheñkeñge saarī ḳharābiyāñ

'bāsir' keī shaḳhsiyat bhī ajab hai ki is meñ haiñ

kuchh ḳhūbiyāñ ḳharāb kuchh achchhī ḳharābiyāñ

kitni hi be-zarar sahi teri KHarabiyan

'basir' KHarabiyan to hain phir bhi KHarabiyan

haalat jagah badalne se badli nahin meri

hoti hain har jagah ki kuchh apni KHarabiyan

tu chahta hai apni nai KHubiyon ki dad

mujh ko aziz teri purani KHarabiyan

junhi talluqat kisi se hue KHarab

sare jahan ki us mein milengi KHarabiyan

sarkar ka hai apna hi mear-e-intiKHab

yaro kahan ki KHubiyan kaisi KHarabiyan

aadam KHata ka putla hai gar man len ye baat

niklengi is KHarabi se kitni KHarabiyan

un hastiyon ki rah pe dekhenge chal ke hum

jin mein na thin kisi bhi tarah ki KHarabiyan

boenge apne bagh mein sab KHubiyon ke bij

jaD se ukhaD phenkenge sari KHarabiyan

'basir' kei shaKHsiyat bhi ajab hai ki is mein hain

kuchh KHubiyan KHarab kuchh achchhi KHarabiyan