kitni mushkil se gham-e-dost bayan hota hai

kitnī mushkil se ġham-e-dost bayāñ hotā hai

ashk thamtā hai na āñkhoñ se ravāñ hotā hai

mutrib-e-vaqt kā āhañg badal detā huuñ

jab tire āriz-o-gesū kā bayāñ hotā hai

rañg-o-bū ban ke jo uḌtā hai shabistānoñ meñ

vo bhī hasrat ke charāġhoñ kā dhuāñ hotā hai

zindagī jabr ke dāman meñ janam letī hai

aadmī daar ke saa.e meñ javāñ hotā hai

Thahar jaatā huuñ tah-e-zulf-e-nigār-e-fardā

bār-e-imroz jo shānoñ pe garāñ hotā hai

zindagī kyā hai bas ik ḳhāna-e-mātam 'jāved'

dil dhaḌaktā hai to ehsās-e-fuġhāñ hotā hai

kitni mushkil se gham-e-dost bayan hota hai

ashk thamta hai na aankhon se rawan hota hai

mutrib-e-waqt ka aahang badal deta hun

jab tere aariz-o-gesu ka bayan hota hai

rang-o-bu ban ke jo uDta hai shabistanon mein

wo bhi hasrat ke charaghon ka dhuan hota hai

zindagi jabr ke daman mein janam leti hai

aadmi dar ke sae mein jawan hota hai

Thahar jata hun tah-e-zulf-e-nigar-e-farda

bar-e-imroz jo shanon pe garan hota hai

zindagi kya hai bas ek KHana-e-matam 'jawed'

dil dhaDakta hai to ehsas-e-fughan hota hai