کتنوں نے بیساکھی تھامی کتنے کاندھے ٹوٹ گئے

کتنوں نے بیساکھی تھامی کتنے کاندھے ٹوٹ گئے

شہرت کے اس بوجھ کو ڈھو کر اچھے اچھے ٹوٹ گئے

ہر دشمن کو سمجھاتا ہوں مجھ سے بغاوت ٹھیک نہیں

پتھر سے ٹکرا کر جانے کتنے شیشے ٹوٹ گئے

وقت کی آندھی میں کچھ ہم نے ایسے پیڑ بھی دیکھے ہیں

وہ جن کی امید نہیں تھی وقت سے پہلے ٹوٹ گئے

وہ معصوم سی پگلی لڑکی بن بیاہے گھر بیٹھی ہے

اک غربت کی خاطر اب تک چھپن رشتے ٹوٹ گئے

تو اپنے اس حسن پہ اتنا ناز نہ کر سن حسن کے بت

ایک بڑھاپے کی ٹھوکر میں لاکھوں پتلے ٹوٹ گئے

ہم سے پوچھو پہنچے ہیں ہم کیسے کیسے منزل تک

تلووں کے اندر چبھ چبھ کر کتنے کانٹے ٹوٹ گئے

عشق وفا امیدیں چاہت نسبت قربت اے انوپمؔ

ہم سے تو بچپن میں ہی یہ سارے کھلونے ٹوٹ گئے