kiya bagh-e-jahan mein nam un ka sarw kah kah kar

kiyā bāġh-e-jahāñ meñ naam un kā sarv kah kah kar

ka.ī aaheñ jo niklī thiiñ mire siine se rah rah kar

sahāb-o-barq haiñ yā shīsha-o-sāġhar haiñ kyā ham tum

ki ham jis vaqt roveñ tum hañso us vaqt qah qah kar

hamārā girya dekhe chashm-e-kam se kyuuñ na dariyā ko

samundar se ka.ī jaate haiñ yaañ ik pal meñ bah bah kar

hue jis gul ke ham chāh-e-zaqan meñ ġharq kar deñge

mire yak qatra-e-shabnam meñ bulbul Duub chah chah kar

dhamak vo aah ke na.are kī apne hai ki gardūñ se

sitāre TuuTe paḌte haiñ kueñ jaate haiñ dah dah kar

barā-e-imtihāñ ushshāq par teġhe chalātā hai

jo zaḳhmī ho ke girte haiñ to rah jaatā hai dah dah kar

dilā kūche se us ke aaj agar tū ḳhair se aayā

yahī din kal bhī hai dar-pesh sheḳhī se na pah pah kar

namāz-e-shaiḳh ho itmām kyūñkar sarqa dushman hai

ki TuuTe hai vuzū har baar jab khāte haiñ ah ah kar

imārat to Dahe phir ban sake hai par tire hāthoñ

hue haiñ ḳhaak kyā kyā qasr-e-dil ai shoḳh Dhah Dhah kar

na ho ruḳh se tire ai aah faujoñ kā muqābil ruḳh

kiyā tū ne savāroñ ko piyāda maat shah shah kar

lab-e-bām aa ke abrū kī jhamak din sulh ke dikhlā

ki aalim dekhne ko shahar kā dauḌe hai mah mah kar

zamīñ meñ gaḌ ga.e dekh us qad-e-ra.anā ko ḳhajlat se

lab-e-jū par akaḌte the khaḌe kyā sarv lah lah kar

vafā.eñ roz-e-avval se mirī tujh ko na ḳhush aa.iiñ

jafā meñ maiñ terī āḳhir huā bhar umr sah sah kar

idhar to jāma-chīn khole hai us gul-rū ke dāman ko

udhar bulbul rakhe hai raḳht-e-gul ḳhajlat se tah tah kar

laḌātā hai agar aġhyār se tū roz-o-shab āñkheñ

'muhib' apne par ai zālim nigāh-e-lutf gah gah kar

kiya bagh-e-jahan mein nam un ka sarw kah kah kar

kai aahen jo nikli thin mere sine se rah rah kar

sahab-o-barq hain ya shisha-o-saghar hain kya hum tum

ki hum jis waqt rowen tum hanso us waqt qah qah kar

hamara girya dekhe chashm-e-kam se kyun na dariya ko

samundar se kai jate hain yan ek pal mein bah bah kar

hue jis gul ke hum chah-e-zaqan mein gharq kar denge

mere yak qatra-e-shabnam mein bulbul Dub chah chah kar

dhamak wo aah ke nare ki apne hai ki gardun se

sitare TuTe paDte hain kuen jate hain dah dah kar

bara-e-imtihan ushshaq par teghe chalata hai

jo zaKHmi ho ke girte hain to rah jata hai dah dah kar

dila kuche se us ke aaj agar tu KHair se aaya

yahi din kal bhi hai dar-pesh sheKHi se na pah pah kar

namaz-e-shaiKH ho itmam kyunkar sarqa dushman hai

ki TuTe hai wuzu har bar jab khate hain ah ah kar

imarat to Dahe phir ban sake hai par tere hathon

hue hain KHak kya kya qasr-e-dil ai shoKH Dhah Dhah kar

na ho ruKH se tere ai aah faujon ka muqabil ruKH

kiya tu ne sawaron ko piyaada mat shah shah kar

lab-e-baam aa ke abru ki jhamak din sulh ke dikhla

ki aalim dekhne ko shahar ka dauDe hai mah mah kar

zamin mein gaD gae dekh us qad-e-rana ko KHajlat se

lab-e-ju par akaDte the khaDe kya sarw lah lah kar

wafaen roz-e-awwal se meri tujh ko na KHush aain

jafa mein main teri aaKHir hua bhar umr sah sah kar

idhar to jama-chin khole hai us gul-ru ke daman ko

udhar bulbul rakhe hai raKHt-e-gul KHajlat se tah tah kar

laData hai agar aghyar se tu roz-o-shab aankhen

'muhib' apne par ai zalim nigah-e-lutf gah gah kar