kiya gardishon ke hawale use chaak par rakh diya

kiyā gardishoñ ke havāle use chaak par rakh diyā

ki banñe bigaḌne kā har faisla ḳhaak par rakh diyā

mujhe qasr-e-ta.abīr kī us ne sab kunjiyāñ sauñp diiñ

magar chhīn kar ḳhvāb āñkhoñ se aflāk par rakh diyā

sivā raakh hone ke ab koī chāra bachā hī nahīñ

sharār-e-havas kis ne ye mere ḳhāshāk par rakh diyā

koī hai jo girdāb-e-ġham se bachā.e hue hai mujhe

ki ik mehrbāñ haath phir chashm-e-namnāk par rakh diyā

koī kaam 'aslam' banā hī nahīñ vahshatoñ ke baġhair

jalā kar charāġh-e-junūñ tāq-e-idrāk par rakh diyā

kiya gardishon ke hawale use chaak par rakh diya

ki banne bigaDne ka har faisla KHak par rakh diya

mujhe qasr-e-tabir ki us ne sab kunjiyan saunp din

magar chhin kar KHwab aankhon se aflak par rakh diya

siwa rakh hone ke ab koi chaara bacha hi nahin

sharar-e-hawas kis ne ye mere KHashak par rakh diya

koi hai jo girdab-e-gham se bachae hue hai mujhe

ki ek mehrban hath phir chashm-e-namnak par rakh diya

koi kaam 'aslam' bana hi nahin wahshaton ke baghair

jala kar charagh-e-junun taq-e-idrak par rakh diya