kiya hai din-dar us sanam ko hazaron tufan uTha-uTha kar

kiyā hai dīñ-dār us sanam ko hazāroñ tūfāñ uThā-uThā kar

lagā.īñ vo tohmateñ ki bolā ḳhudā-ḳhudā kar ḳhudā-ḳhudā kar

tirī mohabbat ne maar Daalā hazār iizā se mujh ko zālim

rulā-rulā kar ghulā-ghulā kar jalā-jalā kar miTā-miTā kar

sharāb-ḳhāna hai ye to zāhid tilism-ḳhāna nahīñ jo TuuTe

ki tauba karte ga.ī hai tauba abhī yahāñ se shikast pā kar

nigah ko bebākiyāñ sikhāo hijāb-e-sharm-o-hayā uThāo

bhulā ke maarā to ḳhaak maarā lagāo choTeñ jatā-jatā kar

na har bashar kā jamāl aisā na har farishte kā haal aisā

kuchh aur se aur ho gayā tū mirī nazar meñ samā-samā kar

ilāhī qāsid kī ḳhair guzre ki aaj kūche se fitna-gar ke

sabā nikaltī hai laḌkhaḌā kar nasīm chaltī hai thartharā kar

janāb-e-sultān-e-ishq vo hai kare jo ai 'dāġh' ik ishāra

farishte hāzir hoñ dast-basta adab se gardan jhukā jhukā kar

kiya hai din-dar us sanam ko hazaron tufan uTha-uTha kar

lagain wo tohmaten ki bola KHuda-KHuda kar KHuda-KHuda kar

teri mohabbat ne mar Dala hazar iza se mujh ko zalim

rula-rula kar ghula-ghula kar jala-jala kar miTa-miTa kar

sharab-KHana hai ye to zahid tilism-KHana nahin jo TuTe

ki tauba karte gai hai tauba abhi yahan se shikast pa kar

nigah ko bebakiyan sikhao hijab-e-sharm-o-haya uThao

bhula ke mara to KHak mara lagao choTen jata-jata kar

na har bashar ka jamal aisa na har farishte ka haal aisa

kuchh aur se aur ho gaya tu meri nazar mein sama-sama kar

ilahi qasid ki KHair guzre ki aaj kuche se fitna-gar ke

saba nikalti hai laDkhaDa kar nasim chalti hai tharthara kar

janab-e-sultan-e-ishq wo hai kare jo ai 'dagh' ek ishaara

farishte hazir hon dast-basta adab se gardan jhuka jhuka kar