kiya hai kaam ye lail-o-nahaar aankhon ne

kiyā hai kaam ye lail-o-nahār āñkhoñ ne

dikhāyā jalva-e-parvardigār āñkhoñ ne

kabhī dikhāyā hai pazhmurda baaġh fasl-e-ḳhizāñ

kabhī dikhā.ī hai fasl-e-bahār āñkhoñ ne

maiñ apne dil pe ye ilzām dhar nahīñ saktā

tabāh mujh ko kiyā surma-dār āñkhoñ ne

hadīs-e-dil jo chhupāne kī laakh koshish kī

magar kiyā hai use āshkār āñkhoñ ne

huī thī maañ kī ziyārat bhī baad barsoñ ke

bahā.e ashk bhī be-iḳhtiyār āñkhoñ ne

tumhārī raah ko tak kar ai yūsuf-e-daurāñ

kiyā hai sub.h-o-masā intizār āñkhoñ ne

dikhā ke ḳhvāb-e-zuleḳhā-e-dirham-o-dīnār

kiyā hai dil ko sadā be-qarār āñkhoñ ne

tumhārī ek hī tasvīr hai jo paas mire

usī ko pyaar kiyā baar baar āñkhoñ ne

ye ashk is liye bahte haiñ merī āñkhoñ se

kiyā hai ḳhvāhish-e-dīdār-e-yār āñkhoñ ne

tum in gunāhoñ se tauba karoge kab 'nūrī'

kiye gunāh haiñ jo be-shumār āñkhoñ ne

kiya hai kaam ye lail-o-nahaar aankhon ne

dikhaya jalwa-e-parwardigar aankhon ne

kabhi dikhaya hai pazhmurda bagh fasl-e-KHizan

kabhi dikhai hai fasl-e-bahaar aankhon ne

main apne dil pe ye ilzam dhar nahin sakta

tabah mujh ko kiya surma-dar aankhon ne

hadis-e-dil jo chhupane ki lakh koshish ki

magar kiya hai use aashkar aankhon ne

hui thi man ki ziyarat bhi baad barson ke

bahae ashk bhi be-iKHtiyar aankhon ne

tumhaari rah ko tak kar ai yusuf-e-dauran

kiya hai subh-o-masa intizar aankhon ne

dikha ke KHwab-e-zuleKHa-e-dirham-o-dinar

kiya hai dil ko sada be-qarar aankhon ne

tumhaari ek hi taswir hai jo pas mere

usi ko pyar kiya bar bar aankhon ne

ye ashk is liye bahte hain meri aankhon se

kiya hai KHwahish-e-didar-e-yar aankhon ne

tum in gunahon se tauba karoge kab 'nuri'

kiye gunah hain jo be-shumar aankhon ne