kiya hai KHud hi giran zist ka safar maine

kiyā hai ḳhud hī girāñ ziist kā safar maiñ ne

katar liye the kabhī apne bāl-o-par maiñ ne

yuuñ apnī zaat meñ ab qaid ho ke baiThā huuñ

ḳhud apne gird uThā.e the bām-o-dar maiñ ne

badal ga.e ḳhat o ma.anī ka.ī zabānoñ ke

jab e'tirāf-e-junūñ kar liyā hunar maiñ ne

tū merī tishna-labī par savāl kartā hai

samundaroñ pe banāyā thā apnā ghar maiñ ne

jo aaj phir se mire bāl-o-par nikal aa.e

to terī raah ke kaTvā diye shajar maiñ ne

maiñ us kī zaat pe yuuñ tabsira nahīñ kartā

ki puure qad se to dekhā nahīñ magar maiñ ne

maiñ chāñd raat kā bhaTkā huā musāfir thā

añdherī raat meñ tanhā kiyā safar maiñ ne

maiñ be-libās to aayā thā bā-libās gayā

ye zād-e-rāh kamāyā rah-e-hunar maiñ ne

vafūr-e-harf ke virse kī aarzū meñ 'sa.īd'

sunā hai 'mīr' aur 'mirzā' kabhī 'jigar' maiñ ne

kiya hai KHud hi giran zist ka safar main ne

katar liye the kabhi apne baal-o-par main ne

yun apni zat mein ab qaid ho ke baiTha hun

KHud apne gird uThae the baam-o-dar main ne

badal gae KHat o mani kai zabanon ke

jab e'tiraf-e-junun kar liya hunar main ne

tu meri tishna-labi par sawal karta hai

samundaron pe banaya tha apna ghar main ne

jo aaj phir se mere baal-o-par nikal aae

to teri rah ke kaTwa diye shajar main ne

main us ki zat pe yun tabsira nahin karta

ki pure qad se to dekha nahin magar main ne

main chand raat ka bhaTka hua musafir tha

andheri raat mein tanha kiya safar main ne

main be-libas to aaya tha ba-libas gaya

ye zad-e-rah kamaya rah-e-hunar main ne

wafur-e-harf ke wirse ki aarzu mein 'said'

suna hai 'mir' aur 'mirza' kabhi 'jigar' main ne