کیا عشق مجازی نے حقیقت آشنا مجھ کو

کیا عشق مجازی نے حقیقت آشنا مجھ کو

بتوں نے ظلم وہ ڈھایا کہ یاد آیا خدا مجھ کو

دعا جب دل نے کی کر دے خدا بے مدعا مجھ کو

دعائے بے اثر نے ہاتھ اٹھا کر دی دعا مجھ کو

نہ رکھنا تھا کہیں کا بھی نہ رکھا ذوق ہستی نے

تماشا کرنا تھا آخر تماشا کر دیا مجھ کو

نہ مجھ سے کام دنیا کو نہ میرے کام کی دنیا

دل ناکام تو نے رکھا یہ کس کام کا مجھ کو

بہت کرتا ہے واعظ گفتگو جنت کی دوزخ کی

کہاں پہنچاتا ہے دیکھوں تو یہ پہنچا ہوا مجھ کو

عذاب زندگی آخر عذاب آخرت نکلا

ہزاروں بار مر مر کے یہاں جینا پڑا مجھ کو

فضا ہمت شکن ہے خضرؔ تو دل حوصلہ افزا

بتائیں گے کہاں تک اہل فن بھی راستہ مجھ کو