kiye hain uzr bahane banae hain kya kya

kiye haiñ 'uzr bahāne banā.e haiñ kyā kyā

savāl-e-vasl pe vo kasmasā.e haiñ kyā kyā

vo dil pe chhā.e nazar meñ samā.e haiñ kyā kyā

ki tark-e-'ishq pe bhī yaad aa.e haiñ kyā kyā

na pūchh lutf-e-charāġhāñ uThā.e haiñ kyā kyā

hamāre dāġh-e-darūñ jagmagā.e haiñ kyā kyā

qatīl-e-ḳhanjar-e-abrū shahīd-e-nāz tire

nahā ke ḳhuun meñ gangā nahā.e haiñ kyā kyā

ham us kī yaad se dam-bhar agar hue ġhāfil

ḳhayāl-e-yār ne shāne hilā.e haiñ kyā kyā

kisī ke 'ishq meñ dāmān-e-zīst tang huā

junūñ ne chāk-e-garebāñ dikhā.e haiñ kyā kyā

huzūr-e-gul kiyā tark-e-adab jo bulbul ne

sabā ne muñh pe tamāñche lagā.e haiñ kyā kyā

sitam-shi’ār isī chashm-e-surma-sā ne tirī

na pūchh ḳhaak meñ armāñ milā.e haiñ kyā kyā

hamārī ābla-pā.ī kī aabrū ke liye

junūñ ne raah meñ kāñTe bichhā.e haiñ kyā kyā

thī āshnā kabhī saaqī kī chashm-e-bāda-farosh

piye haiñ sāġhar-e-gulgūñ pilā.e haiñ kyā kyā

mizāj-e-vaqt bhī badlā nigāh-e-dost ke saath

harīf 'ḳhār' sab apne parā.e haiñ kyā kyā

kiye hain 'uzr bahane banae hain kya kya

sawal-e-wasl pe wo kasmasae hain kya kya

wo dil pe chhae nazar mein samae hain kya kya

ki tark-e-'ishq pe bhi yaad aae hain kya kya

na puchh lutf-e-charaghan uThae hain kya kya

hamare dagh-e-darun jagmagae hain kya kya

qatil-e-KHanjar-e-abru shahid-e-naz tere

naha ke KHun mein ganga nahae hain kya kya

hum us ki yaad se dam-bhar agar hue ghafil

KHayal-e-yar ne shane hilae hain kya kya

kisi ke 'ishq mein daman-e-zist tang hua

junun ne chaak-e-gareban dikhae hain kya kya

huzur-e-gul kiya tark-e-adab jo bulbul ne

saba ne munh pe tamanche lagae hain kya kya

sitam-shi’ar isi chashm-e-surma-sa ne teri

na puchh KHak mein arman milae hain kya kya

hamari aabla-pai ki aabru ke liye

junun ne rah mein kanTe bichhae hain kya kya

thi aashna kabhi saqi ki chashm-e-baada-farosh

piye hain saghar-e-gulgun pilae hain kya kya

mizaj-e-waqt bhi badla nigah-e-dost ke sath

harif 'KHar' sab apne parae hain kya kya