kiye jata jo wo jaur-o-jafa hai

kiye jaatā jo vo jaur-o-jafā hai

jafā kī bhī kuchh āḳhir intihā hai

usī ne de ke dam dil le liyā hai

qusūr is meñ batāo merā kyā hai

faqīroñ kā patā kyā pūchhte ho

jahāñ Thahre vahī rahne kī jā hai

zarā dekho to chashm-e-ġhaur se tum

yahī ā.īna-e-dil haq-numā hai

hue dāġh-e-junūñ taaza hamāre

bahār aa.ī chaman phūlā-phalā hai

tirī ḳhāk-e-qadam ai rashk aisī

marīz-e-hijr ko ḳhāk-e-shifā hai

hai ye daur-e-shabāb ai sāqī-e-dahr

pilā de mai uThī kaalī ghaTā hai

nahīñ da.avā hai qātil se kuchh apnā

mujhe to zab.h 'ḳhanjar' ne kiyā hai

kiye jata jo wo jaur-o-jafa hai

jafa ki bhi kuchh aaKHir intiha hai

usi ne de ke dam dil le liya hai

qusur is mein batao mera kya hai

faqiron ka pata kya puchhte ho

jahan Thahre wahi rahne ki ja hai

zara dekho to chashm-e-ghaur se tum

yahi aaina-e-dil haq-numa hai

hue dagh-e-junun taza hamare

bahaar aai chaman phula-phala hai

teri KHak-e-qadam ai rashk aisi

mariz-e-hijr ko KHak-e-shifa hai

hai ye daur-e-shabab ai saqi-e-dahr

pila de mai uThi kali ghaTa hai

nahin dawa hai qatil se kuchh apna

mujhe to zabh 'KHanjar' ne kiya hai