kohkan-e-shab the raha shaghl sahar hone tak

kohkan-e-shab the rahā shaġhl sahar hone tak

sar paTaknā isī dīvār meñ dar hone tak

us kī aadat thī mire ḳhuun ko paanī karnā

rañg kyā kyā na uḌā aañkh ke tar hone tak

ab davā hai na duā hai na masīhā goyā

har ḳhudā.ī thī mirā ḳhūn-e-jigar hone tak

umr bhar phir se judā.ī ko mohabbat kahnā

dekhnā bhī hai zamāne kī nazar hone tak

apnī aaheñ hī subuk-gām na hone deñgī

pā-ba-zanjīr chalo ḳhatm-e-safar hone tak

shahr kā shahr huā ab to ta.āqub meñ mire

terā jaadū bhī thā mujh ḳhāk-basar hone tak

ye to maiñ thā ki tarāshā hai har ik zaḳhm se phuul

haath kaT jaate haiñ nāḳhun meñ hunar hone tak

kohkan-e-shab the raha shaghl sahar hone tak

sar paTakna isi diwar mein dar hone tak

us ki aadat thi mere KHun ko pani karna

rang kya kya na uDa aankh ke tar hone tak

ab dawa hai na dua hai na masiha goya

har KHudai thi mera KHun-e-jigar hone tak

umr bhar phir se judai ko mohabbat kahna

dekhna bhi hai zamane ki nazar hone tak

apni aahen hi subuk-gam na hone dengi

pa-ba-zanjir chalo KHatm-e-safar hone tak

shahr ka shahr hua ab to taaqub mein mere

tera jadu bhi tha mujh KHak-basar hone tak

ye to main tha ki tarasha hai har ek zaKHm se phul

hath kaT jate hain naKHun mein hunar hone tak