kohsaron mein nahin hai ki bayaban mein nahin

kohsāroñ meñ nahīñ hai ki bayābāñ meñ nahīñ

bāġhbāñ husn faqat tere gulistāñ meñ nahīñ

mauj-e-dariyā kī ravānī ki ghaTāoñ kā ḳhirām

kaun sī baat tirī zulf-e-pareshāñ meñ nahīñ

tujh se ho tark-e-jafā mujh se vafā.eñ chhūTeñ

vo tire bas meñ nahīñ ye mire imkāñ meñ nahīñ

ḳhair dhuñdlā.ī sī thī raushnī-e-shām-e-ḳhizāñ

bāġhbāñ vo bhī to is sub.h-e-bahārāñ meñ nahīñ

chhīn le sāqī-e-be-faiz ke hāthoñ se subū

riñd kyā aisā koī mahfil-e-rindāñ meñ nahīñ

uljhanoñ kā ho asar kyuuñ na sukūn-e-dil par

rabt kyā ham-nafaso sāhil-o-tūfāñ meñ nahīñ

ḳhanda-e-gul ho ki ho girya-e-shabnam 'fāzil'

dāstāñ ġham kī nihāñ kaun se unvāñ meñ nahīñ

kohsaron mein nahin hai ki bayaban mein nahin

baghban husn faqat tere gulistan mein nahin

mauj-e-dariya ki rawani ki ghaTaon ka KHiram

kaun si baat teri zulf-e-pareshan mein nahin

tujh se ho tark-e-jafa mujh se wafaen chhuTen

wo tere bas mein nahin ye mere imkan mein nahin

KHair dhundlai si thi raushni-e-sham-e-KHizan

baghban wo bhi to is subh-e-bahaaran mein nahin

chhin le saqi-e-be-faiz ke hathon se subu

rind kya aisa koi mahfil-e-rindan mein nahin

uljhanon ka ho asar kyun na sukun-e-dil par

rabt kya ham-nafaso sahil-o-tufan mein nahin

KHanda-e-gul ho ki ho girya-e-shabnam 'fazil'

dastan gham ki nihan kaun se unwan mein nahin