koi aae koi jae tamasha ab nahin hoga

koī aa.e koī jaa.e tamāsha ab nahīñ hogā

mohabbat āḳhirī thī ye tamāsha ab nahīñ hogā

nikalnā chāhtā hai vo haqīqat meñ kahānī se

girā do ḳhvāb ke parde tamāsha ab nahīñ hogā

sunā hai is kahānī meñ na.e kirdār aane haiñ

sunā hai naam se mere tamāsha ab nahīñ hogā

tumhārī nazr kartī huuñ tamām ash’ār ye mere

ki safhoñ par siyāhī se tamāsha ab nahīñ hogā

sabab jo bhī ho rusvā.ī kā zimma 'ishq ke sar hai

ḳhudāyā ḳhair ho mujh se tamāsha ab nahīñ hogā

tumheñ haq hai karo shikva ḳhizāñ kī rut hai jān-e-man

qabā.eñ ham na kholeñge tamāsha ab nahīñ hogā

rahegā 'ishq mahv-e-zīst be-shak āḳhirī dam tak

magar haañ naam par us ke tamāsha ab nahīñ hogā

koi aae koi jae tamasha ab nahin hoga

mohabbat aaKHiri thi ye tamasha ab nahin hoga

nikalna chahta hai wo haqiqat mein kahani se

gira do KHwab ke parde tamasha ab nahin hoga

suna hai is kahani mein nae kirdar aane hain

suna hai nam se mere tamasha ab nahin hoga

tumhaari nazr karti hun tamam ash’ar ye mere

ki safhon par siyahi se tamasha ab nahin hoga

sabab jo bhi ho ruswai ka zimma 'ishq ke sar hai

KHudaya KHair ho mujh se tamasha ab nahin hoga

tumhein haq hai karo shikwa KHizan ki rut hai jaan-e-man

qabaen hum na kholenge tamasha ab nahin hoga

rahega 'ishq mahw-e-zist be-shak aaKHiri dam tak

magar han nam par us ke tamasha ab nahin hoga