koi aarzu ban kar shahr-e-dil mein aaya hai

koī aarzū ban kar shahr-e-dil meñ aaya hai

har nafas meñ pinhāñ hai har nazar pe chhāyā hai

bhīgī bhīgī palkoñ par āñsuoñ ke ye qatre

fart-e-shādmānī se merā dil bhar aaya hai

haañ vafā-parastī kā idda.ā nahīñ lekin

be-ḳhudī meñ bhī lab par terā naam aaya hai

chand daaġh to dekhe aur kuchh nahīñ paayā

bārhā sitamgar ne dil ko āzmāyā hai

dosh par havāoñ ke jhūmtā chalā bādal

yā kisī kā āñchal hai jo fazā pe chhāyā hai

saa.e meñ bhī zulfoñ ke kuchh sukūñ nahīñ paayā

tujh ko ai ġham-e-hastī jab gale lagāyā hai

manzil-e-tamannā meñ ab bhaTaknā kyā mā'nī

tere naqsh-e-pā ko jab rahnumā banāyā hai

uTh rahā hai siine se aahoñ kā dhuāñ 'faizī'

jab se ārzūoñ ne ye diyā jalāyā hai

koi aarzu ban kar shahr-e-dil mein aaya hai

har nafas mein pinhan hai har nazar pe chhaya hai

bhigi bhigi palkon par aansuon ke ye qatre

fart-e-shadmani se mera dil bhar aaya hai

han wafa-parasti ka iddaa nahin lekin

be-KHudi mein bhi lab par tera nam aaya hai

chand dagh to dekhe aur kuchh nahin paya

barha sitamgar ne dil ko aazmaya hai

dosh par hawaon ke jhumta chala baadal

ya kisi ka aanchal hai jo faza pe chhaya hai

sae mein bhi zulfon ke kuchh sukun nahin paya

tujh ko ai gham-e-hasti jab gale lagaya hai

manzil-e-tamanna mein ab bhaTakna kya ma'ni

tere naqsh-e-pa ko jab rahnuma banaya hai

uTh raha hai sine se aahon ka dhuan 'faizi'

jab se aarzuon ne ye diya jalaya hai