کوئی آرزو بن کر شہر دل میں آیا ہے

کوئی آرزو بن کر شہر دل میں آیا ہے

ہر نفس میں پنہاں ہے ہر نظر پہ چھایا ہے

بھیگی بھیگی پلکوں پر آنسوؤں کے یہ قطرے

فرط شادمانی سے میرا دل بھر آیا ہے

ہاں وفا پرستی کا ادعا نہیں لیکن

بے خودی میں بھی لب پر تیرا نام آیا ہے

چند داغ تو دیکھے اور کچھ نہیں پایا

بارہا ستم گر نے دل کو آزمایا ہے

دوش پر ہواؤں کے جھومتا چلا بادل

یا کسی کا آنچل ہے جو فضا پہ چھایا ہے

سائے میں بھی زلفوں کے کچھ سکوں نہیں پایا

تجھ کو اے غم ہستی جب گلے لگایا ہے

منزل تمنا میں اب بھٹکنا کیا معنی

تیرے نقش پا کو جب رہنما بنایا ہے

اٹھ رہا ہے سینے سے آہوں کا دھواں فیضیؔ

جب سے آرزوؤں نے یہ دیا جلایا ہے