کوئی آواز دیتا آ رہا تھا جانے کب سے

کوئی آواز دیتا آ رہا تھا جانے کب سے

تو میں باہر نکل کر آ گیا اپنے سبب سے

اداسی دیکھ یہ چہرے جو تیرے کام کے ہیں

نہ جانے کیوں دکھائی دے رہے ہیں بے طلب سے

میں غالب آ چکا تھا عرصۂ ہنگام لیکن

کوئی ہارا ہوا لمحہ نکل آیا عقب سے

کہاں کی چھت کہاں دیوار و در کیسی سکونت

مقدر دشت کو دہلیز بھی کرتا ہے ڈھب سے

تو کیا فرصت میں بھی مصروف رہتا ہوں میں اکثر

چلو محسوس کر لیتا ہوں یہ احساس اب سے

یہ دنیا بھی نہیں تھی اور اب تو زندگی بھی

بہت آساں ہوئی وہ نام یاد آیا ہے جب سے

ہوا نے زخم کی شدت کو خوشبو کر دیا تھا

چھلکتا جا رہا تھا رنگ وہ ملبوس شب سے

یہ شب دراصل ہے کہرام دل کے ڈوبنے کا

ستارو شور ایسا کب ہوا تھا آپ سب سے

اضافہ کب ہوا تھا روشنی میں آسماں پر

ادھوری نیند سے میں اٹھ گیا تھا رات تب سے