koi aawaz deta aa raha tha jaane kab se

koī āvāz detā aa rahā thā jaane kab se

to maiñ bāhar nikal kar aa gayā apne sabab se

udāsī dekh ye chehre jo tere kaam ke haiñ

na jaane kyoñ dikhā.ī de rahe haiñ be-talab se

maiñ ġhālib aa chukā thā arsa-e-hangām lekin

koī haarā huā lamha nikal aaya aqab se

kahāñ kī chhat kahāñ dīvār-o-dar kaisī sukūnat

muqaddar dasht ko dahlīz bhī kartā hai Dhab se

to kyā fursat meñ bhī masrūf rahtā huuñ maiñ aksar

chalo mahsūs kar letā huuñ ye ehsās ab se

ye duniyā bhī nahīñ thī aur ab to zindagī bhī

bahut āsāñ huī vo naam yaad aaya hai jab se

havā ne zaḳhm kī shiddat ko ḳhushbū kar diyā thā

chhalaktā jā rahā thā rang vo malbūs-e-shab se

ye shab dar-asl hai kohrām dil ke Dūbne kā

sitāro shor aisā kab huā thā aap sab se

izāfa kab huā thā raushnī meñ āsmāñ par

adhūrī niiñd se maiñ uTh gayā thā raat tab se

koi aawaz deta aa raha tha jaane kab se

to main bahar nikal kar aa gaya apne sabab se

udasi dekh ye chehre jo tere kaam ke hain

na jaane kyon dikhai de rahe hain be-talab se

main ghaalib aa chuka tha arsa-e-hangam lekin

koi haara hua lamha nikal aaya aqab se

kahan ki chhat kahan diwar-o-dar kaisi sukunat

muqaddar dasht ko dahliz bhi karta hai Dhab se

to kya fursat mein bhi masruf rahta hun main aksar

chalo mahsus kar leta hun ye ehsas ab se

ye duniya bhi nahin thi aur ab to zindagi bhi

bahut aasan hui wo nam yaad aaya hai jab se

hawa ne zaKHm ki shiddat ko KHushbu kar diya tha

chhalakta ja raha tha rang wo malbus-e-shab se

ye shab dar-asl hai kohram dil ke Dubne ka

sitaro shor aisa kab hua tha aap sab se

izafa kab hua tha raushni mein aasman par

adhuri nind se main uTh gaya tha raat tab se