کوئی آزر ہو تو باقی ہے ابھی کام بہت

کوئی آزر ہو تو باقی ہے ابھی کام بہت

بے خدوخال ہیں کہسار میں اصنام بہت

ان درختوں کے مقدر میں بھی لکھ فصل یقیں

جن کی شاخوں پہ ہے شادابیٔ اوہام بہت

زندگی تا حد امکاں ہے سرابوں کا سفر

پھر بھی گنجائش ایماں ہے بہر گام بہت

جن کی دہلیز پہ اگتے ہیں انا کے سورج

ان کی ہر صبح پہ بھاری ہے مری شام بہت

تھا ازل ہی سے ہمیں خوف چراغ خانہ

گو کہ مشکل نہ تھی تعمیر در و بام بہت

تم مرے ذکر سے محتاط رہو گے کب تک

کل کے اخبار اچھالیں گے مرا نام بہت