koi ada jo kahin apne-pan si pata hun

koī adā jo kahīñ apne-pan sī paatā huuñ

dayār-e-ġhair meñ ThanDak vatan sī paatā huuñ

maiñ jab bhī tajziya kartā huuñ terā ai duniyā

is ā.īñe meñ tujhe bad-chalan sī paatā huuñ

ḳhudā kare ki mire dost ḳhairiyat se hoñ

ajiib tarah kī dil meñ chubhan sī paatā huuñ

badalne vaalā hai shāyad mizāj mausam kā

jabīn-e-vaqt ko maiñ pur-shikan sī paatā huuñ

sukūn miltā hai yāroñ se ma.azarat kar ke

ta.alluqāt meñ jab bhī ghuTan sī paatā huuñ

ḳhudā hī rakkhe mire kārvāñ kī ḳhair ab to

ki rāhbar meñ adā rāhzan sī paatā huuñ

maiñ dushmanoñ meñ nahīñ dostoñ meñ huuñ 'mājid'

yahāñ to aur ziyāda ghuTan sī paatā huuñ

koi ada jo kahin apne-pan si pata hun

dayar-e-ghair mein ThanDak watan si pata hun

main jab bhi tajziya karta hun tera ai duniya

is aaine mein tujhe bad-chalan si pata hun

KHuda kare ki mere dost KHairiyat se hon

ajib tarah ki dil mein chubhan si pata hun

badalne wala hai shayad mizaj mausam ka

jabin-e-waqt ko main pur-shikan si pata hun

sukun milta hai yaron se mazarat kar ke

talluqat mein jab bhi ghuTan si pata hun

KHuda hi rakkhe mere karwan ki KHair ab to

ki rahbar mein ada rahzan si pata hun

main dushmanon mein nahin doston mein hun 'majid'

yahan to aur ziyaada ghuTan si pata hun