koi anis koi aashna nahin rakhte

koī aniis koī āshnā nahīñ rakhte

kisī kī aas baġhair az ḳhudā nahīñ rakhte

kisī ko kyā ho diloñ kī shikastagī kī ḳhabar

ki TūTne meñ ye shīshe sadā nahīñ rakhte

faqīr dost jo ho ham ko sarfarāz kare

kuchh aur farsh ba-juz boriyā nahīñ rakhte

musāfiro shab-e-avval bahut hai tiira o taar

charāġh-e-qabr abhī se jalā nahīñ rakhte

vo log kaun se haiñ ai ḳhudā-e-kaun-o-makāñ

suḳhan se kaan ko jo āshnā nahīñ rakhte

musāfirān-e-adam kā pata mile kyūñkar

vo yuuñ ga.e ki kahīñ naqsh-e-pā nahīñ rakhte

tap-e-darūñ ġham-e-furqat varam-e-payāda-ravī

maraz to itne haiñ aur kuchh davā nahīñ rakhte

khulegā haal unheñ jab ki aañkh band huī

jo log ulfat-e-mushkil-kushā nahīñ rakhte

jahāñ kī lazzat o ḳhvāhish se hai bashar kā ḳhamīr

vo kaun haiñ ki jo hirs-o-havā nahīñ rakhte

'anīs' bech ke jaañ apnī hind se niklo

jo tosha-e-safar-e-karbalā nahīñ rakhte

koi anis koi aashna nahin rakhte

kisi ki aas baghair az KHuda nahin rakhte

kisi ko kya ho dilon ki shikastagi ki KHabar

ki TuTne mein ye shishe sada nahin rakhte

faqir dost jo ho hum ko sarfaraaz kare

kuchh aur farsh ba-juz boriya nahin rakhte

musafiro shab-e-awwal bahut hai tera o tar

charagh-e-qabr abhi se jala nahin rakhte

wo log kaun se hain ai KHuda-e-kaun-o-makan

suKHan se kan ko jo aashna nahin rakhte

musafiran-e-adam ka pata mile kyunkar

wo yun gae ki kahin naqsh-e-pa nahin rakhte

tap-e-darun gham-e-furqat waram-e-payaada-rawi

maraz to itne hain aur kuchh dawa nahin rakhte

khulega haal unhen jab ki aankh band hui

jo log ulfat-e-mushkil-kusha nahin rakhte

jahan ki lazzat o KHwahish se hai bashar ka KHamir

wo kaun hain ki jo hirs-o-hawa nahin rakhte

'anis' bech ke jaan apni hind se niklo

jo tosha-e-safar-e-karbala nahin rakhte