koi anmol shai pai hui si lag rahi hai

koī anmol shai paa.ī huī sī lag rahī hai

ki chehre par chamak aa.ī huī sī lag rahī hai

tasalsul hai ḳhunuk sāyoñ kā jo had-e-nazar tak

fazā meñ zulf lahrā.ī huī sī lag rahī hai

gayā hai kaun uTh kar aaj is bazm-e-jahāñ se

udāsī har taraf chhā.ī huī sī lag rahī hai

kahīñ ham dekhte haiñ be-hisī par ḳhauf taarī

kahīñ ġhairat bhī tharrā.ī huī sī lag rahī hai

tujhe rote hue us ne kahīñ dekhā hai shāyad

ki shabnam aaj sharmā.ī huī sī lag rahī hai

abhī kuchh der pahle is qadar ḳhushbū kahāñ thī

ye mahfil terī mahkā.ī huī sī lag rahī hai

tasavvur meñ na jaane aa gayā hai kis kā chehra

tabī.at aaj lalchā.ī huī sī lag rahī hai

koi anmol shai pai hui si lag rahi hai

ki chehre par chamak aai hui si lag rahi hai

tasalsul hai KHunuk sayon ka jo had-e-nazar tak

faza mein zulf lahrai hui si lag rahi hai

gaya hai kaun uTh kar aaj is bazm-e-jahan se

udasi har taraf chhai hui si lag rahi hai

kahin hum dekhte hain be-hisi par KHauf tari

kahin ghairat bhi tharrai hui si lag rahi hai

tujhe rote hue us ne kahin dekha hai shayad

ki shabnam aaj sharmai hui si lag rahi hai

abhi kuchh der pahle is qadar KHushbu kahan thi

ye mahfil teri mahkai hui si lag rahi hai

tasawwur mein na jaane aa gaya hai kis ka chehra

tabiat aaj lalchai hui si lag rahi hai