koi apne waste mahshar uTha kar le gaya

koī apne vāste mahshar uThā kar le gayā

yaanī mere ḳhvāb kā manzar uThā kar le gayā

zaḳhm-ḳhurda thā yaqīnan koī ḳhushbū-āshnā

jo lagā thā sar pe vo patthar uThā kar le gayā

gosha gosha ā.ina-ḳhāna nazar aayā mujhe

ḳhud ko jab bāhar se maiñ andar uThā kar le gayā

kyuuñ sarāboñ ko samajhtā hai vo bahr-e-be-karāñ

kyuuñ vo merī zaat kā paikar uThā kar le gayā

kuchh na kuchh le kar hī kuchh detī hai duniyā is liye

ḳhud-ġharaz duniyā se maiñ daftar uThā kar le gayā

maiñ to sañg-e-mīl huuñ har rāh-rau ke vāste

kyā milegā koī mujh ko gar uThā kar le gayā

atlas-o-kam-ḳhvāb meñ malbūs thā jis kā badan

kyuuñ mirī mailī sī vo chādar uThā kar le gayā

kal talak jo kah rahā thā mere fan ko rā.egāñ

aaj vo merā ġhazal-sāgar uThā kar le gayā

kis ne mujh ko anjuman meñ kar diyā tanhā 'valī'

kaun merī fikr kā mehvar uThā kar le gayā

koi apne waste mahshar uTha kar le gaya

yani mere KHwab ka manzar uTha kar le gaya

zaKHm-KHurda tha yaqinan koi KHushbu-ashna

jo laga tha sar pe wo patthar uTha kar le gaya

gosha gosha aaina-KHana nazar aaya mujhe

KHud ko jab bahar se main andar uTha kar le gaya

kyun sarabon ko samajhta hai wo bahr-e-be-karan

kyun wo meri zat ka paikar uTha kar le gaya

kuchh na kuchh le kar hi kuchh deti hai duniya is liye

KHud-gharaz duniya se main daftar uTha kar le gaya

main to sang-e-mil hun har rah-rau ke waste

kya milega koi mujh ko gar uTha kar le gaya

atlas-o-kam-KHwab mein malbus tha jis ka badan

kyun meri maili si wo chadar uTha kar le gaya

kal talak jo kah raha tha mere fan ko raegan

aaj wo mera ghazal-sagar uTha kar le gaya

kis ne mujh ko anjuman mein kar diya tanha 'wali'

kaun meri fikr ka mehwar uTha kar le gaya