koi arman talash-e-dost ka kyun dil mein rah jata

koī armāñ talāsh-e-dost kā kyuuñ dil meñ rah jaatā

ġhubār apnā agar gard-e-rah-e-manzil meñ rah jaatā

nahīñ mā'lūm kis muddat se ḳhanjar tishna-e-ḳhūñ thā

koī ḳhatra lahū kā kyuuñ tan-e-bismil meñ rah jaatā

safā.ī kab thī mumkin ye ġhubār-e-dil vo kāfir hai

mire dil se nikaltā bhī to us ke dil meñ rah jaatā

jalā aur jal ke soz-e-rashk se dil bujh gayā fauran

agar hotā charāġh-o-sham.a us mahfil meñ rah jaatā

ta.assuf hai ġhubār-e-qais kī parvāz-e-hasrat par

lipaT kar kaash thoḌā parda-e-mahmil meñ rah jaatā

na detā gar sahārā kuchh umīd-e-vasl kā tūfāñ

shanāvar bahr-e-ġham kā hasrat-e-sāhil meñ rah jaatā

is ā.īne meñ gar vo dekh lete rū-e-anvar ko

to kyuuñ itnā baḌā dhabba mah-e-kāmil meñ rah jaatā

na miltā mudda.ā-e-dil diram miltā jo mun'im se

magar ik daaġh ban kar vo kaf-e-sā.il meñ rah jaatā

nishāñ us kā kahīñ miltā surāġh us kā kahīñ lagtā

to apnā paañv kyuuñ thak kar rah-e-manzil meñ rah jaatā

'nazar' ham ko 'ilāqa sher se kyā par ye hasrat hai

na rahte ham to apnā zikr us mahfil meñ rah jaatā

koi arman talash-e-dost ka kyun dil mein rah jata

ghubar apna agar gard-e-rah-e-manzil mein rah jata

nahin ma'lum kis muddat se KHanjar tishna-e-KHun tha

koi KHatra lahu ka kyun tan-e-bismil mein rah jata

safai kab thi mumkin ye ghubar-e-dil wo kafir hai

mere dil se nikalta bhi to us ke dil mein rah jata

jala aur jal ke soz-e-rashk se dil bujh gaya fauran

agar hota charagh-o-shama us mahfil mein rah jata

tassuf hai ghubar-e-qais ki parwaz-e-hasrat par

lipaT kar kash thoDa parda-e-mahmil mein rah jata

na deta gar sahaara kuchh umid-e-wasl ka tufan

shanawar bahr-e-gham ka hasrat-e-sahil mein rah jata

is aaine mein gar wo dekh lete ru-e-anwar ko

to kyun itna baDa dhabba mah-e-kaamil mein rah jata

na milta muddaa-e-dil diram milta jo mun'im se

magar ek dagh ban kar wo kaf-e-sail mein rah jata

nishan us ka kahin milta suragh us ka kahin lagta

to apna panw kyun thak kar rah-e-manzil mein rah jata

'nazar' hum ko 'ilaqa sher se kya par ye hasrat hai

na rahte hum to apna zikr us mahfil mein rah jata