koi baada-kash jise mai-kashi ka tariq-e-KHas na aa saka

koī bāda-kash jise mai-kashī kā tarīq-e-ḳhās na aa sakā

ġham-e-zindagī kī kashā-kashoñ se kabhī najāt na pā sakā

ye muqaddarāt ke sho.abde ye mire nasīb ye bebasī

ki vo pūchhne bhī lage kabhī to maiñ dard-e-dil na sunā sakā

mirī hamsarī kā ḳhayāl kyā mirī ham-rahī kā savāl kyā

rah-e-ishq kā koī rāh-rau mirī gard ko bhī na pā sakā

zar-o-sīm shohrat-o-martaba mujhe is jahāñ meñ milā na kyā

magar ek shai thī sukūn-e-dil jo maiñ zindagī meñ na pā sakā

mirī guftugū meñ vo zor thā ki suḳhan-shanās the dam-ba-ḳhud

magar un kī mahfil-e-nāz meñ maiñ zabān tak na hilā sakā

kabhī āñdhiyoñ ne uḌā diyā kabhī bijliyoñ ne jalā diyā

kisī haal meñ mirā āshiyāñ mujhe aah raas na aa sakā

kahīñ dostoñ kī tasalliyoñ se huī hai dard meñ kuchh kamī

ye to ek kahne kī baat hai koī ġham hai kis kā baTā sakā

use ai 'naresh' maiñ kyā kahūñ jo kahūñ na ishq kā mo.ajiza

ki ġham-e-jahāñ to ġham-e-jahāñ mujhe āsmāñ na miTā sakā

koi baada-kash jise mai-kashi ka tariq-e-KHas na aa saka

gham-e-zindagi ki kasha-kashon se kabhi najat na pa saka

ye muqaddaraat ke shoabde ye mere nasib ye bebasi

ki wo puchhne bhi lage kabhi to main dard-e-dil na suna saka

meri hamsari ka KHayal kya meri ham-rahi ka sawal kya

rah-e-ishq ka koi rah-rau meri gard ko bhi na pa saka

zar-o-sim shohrat-o-martaba mujhe is jahan mein mila na kya

magar ek shai thi sukun-e-dil jo main zindagi mein na pa saka

meri guftugu mein wo zor tha ki suKHan-shanas the dam-ba-KHud

magar un ki mahfil-e-naz mein main zaban tak na hila saka

kabhi aandhiyon ne uDa diya kabhi bijliyon ne jala diya

kisi haal mein mera aashiyan mujhe aah ras na aa saka

kahin doston ki tasalliyon se hui hai dard mein kuchh kami

ye to ek kahne ki baat hai koi gham hai kis ka baTa saka

use ai 'naresh' main kya kahun jo kahun na ishq ka moajiza

ki gham-e-jahan to gham-e-jahan mujhe aasman na miTa saka