koi bachne ka nahin sab ka pata jaanti hai

koī bachne kā nahīñ sab kā patā jāntī hai

kis taraf aag lagānā hai havā jāntī hai

ujle kapḌoñ meñ raho yā ki naqābeñ Daalo

tum ko har rañg meñ ye ḳhalq-e-ḳhudā jāntī hai

rok pā.egī na zanjīr na dīvār koī

apnī manzil kā pata āh-e-rasā jāntī hai

TuuT jā.ūñgā bikhar jā.ūñgā hārūñgā nahīñ

merī himmat ko zamāne kī havā jāntī hai

aap sach bol rahe haiñ to pashemāñ kyuuñ haiñ

ye vo duniyā hai jo achchhoñ ko burā jāntī hai

āñdhiyāñ zor dikhā.eñ bhī to kyā hotā hai

gul khilāne kā hunar bād-e-sabā jāntī hai

aañkh vaale nahīñ pahchānte us ko 'manzar'

jitne nazdīk se phūloñ kī adā jāntī hai

koi bachne ka nahin sab ka pata jaanti hai

kis taraf aag lagana hai hawa jaanti hai

ujle kapDon mein raho ya ki naqaben Dalo

tum ko har rang mein ye KHalq-e-KHuda jaanti hai

rok paegi na zanjir na diwar koi

apni manzil ka pata aah-e-rasa jaanti hai

TuT jaunga bikhar jaunga haarunga nahin

meri himmat ko zamane ki hawa jaanti hai

aap sach bol rahe hain to pasheman kyun hain

ye wo duniya hai jo achchhon ko bura jaanti hai

aandhiyan zor dikhaen bhi to kya hota hai

gul khilane ka hunar baad-e-saba jaanti hai

aankh wale nahin pahchante us ko 'manzar'

jitne nazdik se phulon ki ada jaanti hai