koi baDh kar sitam mujh par sitam-ijad kya karta

koī baḌh kar sitam mujh par sitam-ījād kyā kartā

basāyā hī nahīñ jis ko use barbād kyā kartā

sikhāyā bolnā us ko zabān-e-be-zabānī se

agar lab khol letī maiñ vo phir irshād kyā kartā

kahāñ qad nāptā merā bhalā ye sher-e-kam-qāmat

so merā sher bhī pā kar siyāsī daad kyā kartā

nikal vo ḳhud nahīñ paatā shikanj-e-zāt se apnī

jo apnī qaid meñ ḳhud ho mujhe āzād kyā kartā

jahāñ baazū rasan-basta jahāñ qadġhan ho lafzoñ par

koī zanjīr kyā hiltī koī fariyād kyā kartā

agar fitrat ho sīmābī tabī.at bhī ho sailānī

dar-o-dīvār kyā rakhtā vo ghar ābād kyā kartā

rihā.ī zulm se us ke mayassar aur mumkin thī

magar maiñ ne yahī sochā vo mere ba.ad kyā kartā

koi baDh kar sitam mujh par sitam-ijad kya karta

basaya hi nahin jis ko use barbaad kya karta

sikhaya bolna us ko zaban-e-be-zabani se

agar lab khol leti main wo phir irshad kya karta

kahan qad napta mera bhala ye sher-e-kam-qamat

so mera sher bhi pa kar siyasi dad kya karta

nikal wo KHud nahin pata shikanj-e-zat se apni

jo apni qaid mein KHud ho mujhe aazad kya karta

jahan bazu rasan-basta jahan qadghan ho lafzon par

koi zanjir kya hilti koi fariyaad kya karta

agar fitrat ho simabi tabiat bhi ho sailani

dar-o-diwar kya rakhta wo ghar aabaad kya karta

rihai zulm se us ke mayassar aur mumkin thi

magar main ne yahi socha wo mere baad kya karta