koi barham ho to hans-hans kar mila karta hun main

koī barham ho to hañs-hañs kar milā kartā huuñ maiñ

ahl-e-duniyā ko mohabbat-āshnā kartā huuñ maiñ

chupke-chupke sab harīfoñ kī sunā kartā huuñ maiñ

jurm ye hai zikr-e-taslīm-o-razā kartā huuñ maiñ

kyā karūñ zikr-e-ḳhudā is daur meñ suntā hai kaun

hāl-e-duniyā dekh kar yād-e-ḳhudā kartā huuñ maiñ

kyā qayāmat hai ki ab vo bhī haiñ mujh se bad-gumāñ

'azmatoñ kā jin kī charchā jā-ba-jā kartā huuñ maiñ

peshkash kyā kar sakūñ kyā nazr duuñ kyā bheñT duuñ

chand aañsū haiñ jinheñ harf-e-du'ā kartā huuñ maiñ

rasm-o-rāh-e-kā'ba-o-but-ḳhāna se huuñ bā-ḳhabar

muḳhtalif andāz ke sajde kiyā kartā huuñ maiñ

koi barham ho to hans-hans kar mila karta hun main

ahl-e-duniya ko mohabbat-ashna karta hun main

chupke-chupke sab harifon ki suna karta hun main

jurm ye hai zikr-e-taslim-o-raza karta hun main

kya karun zikr-e-KHuda is daur mein sunta hai kaun

haal-e-duniya dekh kar yaad-e-KHuda karta hun main

kya qayamat hai ki ab wo bhi hain mujh se bad-guman

'azmaton ka jin ki charcha ja-ba-ja karta hun main

peshkash kya kar sakun kya nazr dun kya bhenT dun

chand aansu hain jinhen harf-e-du'a karta hun main

rasm-o-rah-e-ka'ba-o-but-KHana se hun ba-KHabar

muKHtalif andaz ke sajde kiya karta hun main