کوئی بشر مجھے ایسا نظر نہیں آتا

کوئی بشر مجھے ایسا نظر نہیں آتا

کہ تیرے کوچہ سے تھامے جگر نہیں آتا

رفیق واں کوئی جاتا ہے رحم کھا کے اگر

تو پھر وہ بھول کے رستہ ادھر نہیں آتا

نہیں میں قابل لطف و کرم تو اے ظالم

ستم بھی مجھ پہ نہ کر رحم گر نہیں آتا

جمال یار نہ دیکھا تھا جب تک آتا تھا

اور اب تو حشر تلک نامہ بر نہیں آتا

کہاں تلک ارے بے رحم مشق تیر ستم

نشان گور بھی اب تو نظر نہیں آتا

طرح طرح کے ستم مجھ پہ ہوتے ہیں ظالم

جلانا غیر کا تجھ کو مگر نہیں آتا

مریض درد محبت کا دل نہ توڑ اپنے

نہیں تو منہ سے نہ کر تو اگر نہیں آتا

ملایا خاک میں اور اس پہ کہتے ہیں کہ مجھے

کچھ امتحان محبت کا کر نہیں آتا

ہوا ہوں بے خودیٔ عشق سے یہاں تک محو

کہ یار سامنے ہے اور نظر نہیں آتا

مسیح ہے پہ جلانا مرا نہیں منظور

مرے جنازہ پہ وہ جان کر نہیں آتا

ہوا ہے حال حیاؔ کا یہ ہجر میں تیرے

کہ اب تو سانس بھی دودو پہر نہیں آتا