koi bashar mujhe aisa nazar nahin aata

koī bashar mujhe aisā nazar nahīñ aatā

ki tere kūche se thāme jigar nahīñ aatā

rafīq vaañ koī jaatā hai rahm khā ke agar

to phir vo bhuul ke rasta idhar nahīñ aatā

nahīñ maiñ qābil-e-lutf-o-karam to ai zālim

sitam bhī mujh pe na kar rahm gar nahīñ aatā

jamāl-e-yār na dekhā thā jab tak aatā thā

aur ab to hashr talak nāma-bar nahīñ aatā

kahāñ talak are be-rahm mashq-e-tīr-e-sitam

nishān-e-gor bhī ab to nazar nahīñ aatā

tarah tarah ke sitam mujh pe hote haiñ zālim

jalānā ġhair kā tujh ko magar nahīñ aatā

marīz-e-dard-e-mohabbat kā dil na toḌ apne

nahīñ to muñh se na kar tū agar nahīñ aatā

milāyā ḳhaak meñ aur us pe kahte haiñ ki mujhe

kuchh imtihān mohabbat kā kar nahīñ aatā

huā huuñ be-ḳhudī-e-ishq se yahāñ tak mahv

ki yaar sāmne hai aur nazar nahīñ aatā

masīh hai pe jilānā mirā nahīñ manzūr

mire janāza pe vo jaan kar nahīñ aatā

huā hai haal 'hayā' kā ye hijr meñ tere

ki ab to saañs bhī do-do pahar nahīñ aatā

koi bashar mujhe aisa nazar nahin aata

ki tere kuche se thame jigar nahin aata

rafiq wan koi jata hai rahm kha ke agar

to phir wo bhul ke rasta idhar nahin aata

nahin main qabil-e-lutf-o-karam to ai zalim

sitam bhi mujh pe na kar rahm gar nahin aata

jamal-e-yar na dekha tha jab tak aata tha

aur ab to hashr talak nama-bar nahin aata

kahan talak are be-rahm mashq-e-tir-e-sitam

nishan-e-gor bhi ab to nazar nahin aata

tarah tarah ke sitam mujh pe hote hain zalim

jalana ghair ka tujh ko magar nahin aata

mariz-e-dard-e-mohabbat ka dil na toD apne

nahin to munh se na kar tu agar nahin aata

milaya KHak mein aur us pe kahte hain ki mujhe

kuchh imtihan mohabbat ka kar nahin aata

hua hun be-KHudi-e-ishq se yahan tak mahw

ki yar samne hai aur nazar nahin aata

masih hai pe jilana mera nahin manzur

mere janaza pe wo jaan kar nahin aata

hua hai haal 'haya' ka ye hijr mein tere

ki ab to sans bhi do-do pahar nahin aata