کوئی بتلاؤ کہ یہ ناؤ کہاں ٹھہرے گی

کوئی بتلاؤ کہ یہ ناؤ کہاں ٹھہرے گی

کب قضا آئے گی کب عمر رواں ٹھہرے گی

زندگی ایک حقیقت سہی لیکن اے دوست

گر یہی حال رہا وہم و گماں ٹھہرے گی

سوئے جولاں گہ ہستی نگراں ہے دیکھو

یہ نظر اب رخ ساقی پہ کہاں ٹھہرے گی

ہے بہت سادہ غم دل کا فسانہ اس پر

بار پیچیدگی شرح و بیاں ٹھہرے گی

شہر درد ایک نیا ہوگا وہاں پر آباد

میری آواز سر دشت جہاں ٹھہرے گی

دوستو موت سے اپنی یہ مثالی پیکار

باعث رشک مسیحا نفساں ٹھہرے گی

جس سے حق گوئی کی زندہ ہے روایت اے دوست

آج تعزیر کے قابل وہ زباں ٹھہرے گی

سر گراں آج ہیں جابرؔ سے سخن کے نقاد

کل کو معیار غزل اس کی فغاں ٹھہرے گی