koi bhi dil mein nahin ab aarzu

koī bhī dil meñ nahīñ ab aarzū

hai ḳhayāl-e-yār mere rū-ba-rū

vo bane unvāñ kitāb-e-zīst kā

aur kyā ho us kī ḳhātir justujū

merī āñkhoñ meñ ye kis kā aks hai

kar rahā hai kaun mujh se guftugū

dekh kar jis ko bahāreñ jhuk ga.iiñ

us kī ḳhushbū hai chaman meñ chaar sū

baat koī to bane ḳhanjar uThā

gar tujhe maqsūd hai merā lahū

bārgāh-e-ishq se aa.ī nidā

hai dar-e-jānāñ pe marnā aabrū

muntaḳhab jis ko mire dil ne kiyā

us se baḌh kar kaun hogā ḳhūb-rū

pī rahā huuñ maiñ nigāh-e-yār se

hech haiñ mere liye jām-o-subū

ḳhūgar-e-dard-e-mohabbat maiñ hī thā

kis liye kartā maiñ zaḳhm-e-dil rafū

iztirāb-e-hijr kā aalam na pūchh

kar rahā huuñ apne ashkoñ se vuzū

mere dil meñ kaash 'sā.ir' jhāñk kar

dekh lete apne ahbāb-o-adū

koi bhi dil mein nahin ab aarzu

hai KHayal-e-yar mere ru-ba-ru

wo bane unwan kitab-e-zist ka

aur kya ho us ki KHatir justuju

meri aankhon mein ye kis ka aks hai

kar raha hai kaun mujh se guftugu

dekh kar jis ko bahaaren jhuk gain

us ki KHushbu hai chaman mein chaar su

baat koi to bane KHanjar uTha

gar tujhe maqsud hai mera lahu

bargah-e-ishq se aai nida

hai dar-e-jaanan pe marna aabru

muntaKHab jis ko mere dil ne kiya

us se baDh kar kaun hoga KHub-ru

pi raha hun main nigah-e-yar se

hech hain mere liye jam-o-subu

KHugar-e-dard-e-mohabbat main hi tha

kis liye karta main zaKHm-e-dil rafu

iztirab-e-hijr ka aalam na puchh

kar raha hun apne ashkon se wuzu

mere dil mein kash 'sair' jhank kar

dekh lete apne ahbab-o-adu