koi bhi saman nahin hai ab meri hairani ko

koī bhī sāmān nahīñ hai ab merī hairānī ko

ātish-dān meñ pheñk diyā hai ik ḳhat likh kar paanī ko

kirdāroñ kī khep bulā kar kyā tasvīr banāoge

ek kahānī se dhāñpoge kis kis kī uryānī ko

un se pūchho jin par guzre lamhe asl qayāmat ke

log to hijrat kah dete haiñ har ik naql-e-makānī ko

ham ne jis lamhe sauñpe the ḳhvāb bilorīñ āñkhoñ ko

kos rahe haiñ ab tak ham us lamhe kī nādānī ko

jis chashme se paanī piinā us kā saudā kar denā

ġhaddārī kahte haiñ bhaa.ī aisī be-īmānī ko

ghuur rahā hai merā dil kab se ik ḳhālī pinjre ko

zindāñ se āvāz aatī hai aa jaao zindānī ko

kaise tanhā kamre se uTh kar bāzār meñ aa jaa.eñ

mushkil se yaad kiyā hai ham ne us vīrānī ko

koi bhi saman nahin hai ab meri hairani ko

aatish-dan mein phenk diya hai ek KHat likh kar pani ko

kirdaron ki khep bula kar kya taswir banaoge

ek kahani se dhanpoge kis kis ki uryani ko

un se puchho jin par guzre lamhe asl qayamat ke

log to hijrat kah dete hain har ek naql-e-makani ko

hum ne jis lamhe saunpe the KHwab bilorin aankhon ko

kos rahe hain ab tak hum us lamhe ki nadani ko

jis chashme se pani pina us ka sauda kar dena

ghaddari kahte hain bhai aisi be-imani ko

ghur raha hai mera dil kab se ek KHali pinjre ko

zindan se aawaz aati hai aa jao zindani ko

kaise tanha kamre se uTh kar bazar mein aa jaen

mushkil se yaad kiya hai hum ne us virani ko