koi bhi shaKHs jo wahm-o-guman ki zad mein raha

koī bhī shaḳhs jo vahm-o-gumāñ kī zad meñ rahā

vo tā-hayāt azāb-e-qubūl-o-rad meñ rahā

ḳhudā kī zaat meñ zam ho gayā jahāñ darvesh

vahāñ na farq koī kāre-nek-o-bad meñ rahā

vo mohtaram hai jo tasḳhīr-e-zāt kī ḳhātir

tamām umr laḌā aur apnī had meñ rahā

mire hī dam se kahānī meñ ma.anaviyyat thī

mirā shumār magar harf-e-mustarad meñ rahā

vo har lihāz se nā-mo'tabar ikaa.ī thā

magar vaqār se maujūd har adad meñ rahā

ajal ne ziist ke sab mas.ale sameT liye

baḌe sukūn se vo gosha-e-lahad meñ rahā

vo maiñ nahīñ thā koī aur shaḳhs thā ai 'soz'

jo merā jism liye mere ḳhāl-o-ḳhad meñ rahā

koi bhi shaKHs jo wahm-o-guman ki zad mein raha

wo ta-hayat azab-e-qubul-o-rad mein raha

KHuda ki zat mein zam ho gaya jahan darwesh

wahan na farq koi kare-nek-o-bad mein raha

wo mohtaram hai jo tasKHir-e-zat ki KHatir

tamam umr laDa aur apni had mein raha

mere hi dam se kahani mein manawiyyat thi

mera shumar magar harf-e-mustarad mein raha

wo har lihaz se na-mo'tabar ikai tha

magar waqar se maujud har adad mein raha

ajal ne zist ke sab masale sameT liye

baDe sukun se wo gosha-e-lahad mein raha

wo main nahin tha koi aur shaKHs tha ai 'soz'

jo mera jism liye mere KHal-o-KHad mein raha