koi chhoTa yahan koi baDa hai

koī chhoTā yahāñ koī baḌā hai

ye saarā khel zālim vaqt kā hai

vo sar karte haiñ jin ko hausla hai

vagarna zindagī ik marhala hai

tujhe ma.alūm kyā hai lazzat-e-ġham

tirā dil ishq se nā-āshnā hai

jo ḳhud vāqif nahīñ manzil se apnī

ḳhudā baḳhshe hamārā rahnumā hai

Dubo.egā use kyā koī tūfāñ

ḳhudā kashtī kā jis kī nāḳhudā hai

chhupā.ūñ aa.ine se kyā haqīqat

baḌā kam-baḳht hai sach boltā hai

faqat ik darmiyāñ pardā hai varna

tirā merā azal se vāsta hai

milā kar haath ham se fā.eda kyā

vahī ab tak diloñ meñ fāsla hai

nazar jaatī nahīñ 'asġhar' kisī par

nazar meñ jab se vo jalva-numā hai

koi chhoTa yahan koi baDa hai

ye sara khel zalim waqt ka hai

wo sar karte hain jin ko hausla hai

wagarna zindagi ek marhala hai

tujhe malum kya hai lazzat-e-gham

tera dil ishq se na-ashna hai

jo KHud waqif nahin manzil se apni

KHuda baKHshe hamara rahnuma hai

Duboega use kya koi tufan

KHuda kashti ka jis ki naKHuda hai

chhupaun aaine se kya haqiqat

baDa kam-baKHt hai sach bolta hai

faqat ek darmiyan parda hai warna

tera mera azal se wasta hai

mila kar hath hum se faeda kya

wahi ab tak dilon mein fasla hai

nazar jati nahin 'asghar' kisi par

nazar mein jab se wo jalwa-numa hai