koi dara-e-jaan hai kya malum

koī dārā-e-jāñ hai kyā ma.alūm

yā faqat dāstāñ hai kyā ma.alūm

kyā hudūd-e-yaqīñ meñ hai ḳhallāq

yā sarāsar gumāñ hai kyā ma.alūm

aarzū thī ḳhudā ko yā hājat

kyuuñ vajūd-e-jahāñ hai kyā ma.alūm

lahv yā ḳhud meñ naqs kā ehsās

illat-e-ins-o-jāñ hai kyā ma.alūm

iztirāran ki ba.ad-e-fikr-e-daqīq

ḳhil.at-e-īñ-o-āñ hai kyā ma.alūm

kis liye kis taraf bahar saa.at

raḳhsh-e-hastī davāñ hai kyā ma.alūm

kis ḳhalā-e-nazar ke bharne ko

ye zamīñ āsmāñ hai kyā ma.alūm

hai kahīñ āftāb-e-zāt-o-sifāt

yā shuā-e-bayāñ hai kyā ma.alūm

kuchh nahīñ hai ba-juz fareb yahāñ

aur sab kuchh vahāñ hai kyā ma.alūm

kis liye aql ke safīne meñ

naql kā bādbāñ hai kyā ma.alūm

chāplūsī meñ kis liye mashġhūl

ḳhail-e-karrubiyāñ hai kyā ma.alūm

malgajāhaT sī hai sar-e-gardūñ

abr hai yā dhuāñ hai kyā ma.alūm

vo tavānā.ī hai ki shaḳhsiyyat

kaun shāh-e-zamāñ hai kyā ma.alūm

ban ke pīchhe hai ik ḳhafī halchal

gard-e-pā kārvāñ hai kyā ma.alūm

shar hai kyuuñ is qadar lahīm-o-shahīm

ḳhair kyuuñ nīm-jāñ hai kyā ma.alūm

shaitanat kyuuñ hai rashk-e-māh-e-munīr

kyuuñ risālat katāñ hai kyā ma.alūm

kaun said-e-gunāh hai amdan

kyuuñ jahannum tapāñ hai kyā ma.alūm

kyā havādis ba-taur-e-mashġhala haiñ

yā sar-e-imtihāñ hai kyā ma.alūm

aur kyuuñ imtihāñ ke chakkar meñ

ālim-o-ġhaib-dāñ hai kyā ma.alūm

kaun in fāqa-kash ġharīboñ kā

zāmin-e-āb-o-nāñ hai kyā ma.alūm

āñkheñ labrez haiñ subū ḳhālī

kaun pīr-e-muġhāñ hai kyā ma.alūm

sikka-e-maut shahr-e-hastī meñ

kis ḳhatā par ravāñ hai kyā ma.alūm

nafs-e-ammāra baḳhshne vaalā

ham se kyuuñ sar-garāñ hai kyā ma.alūm

kyuuñ hamārī zamīn par har aan

karbalā kā samāñ hai kyā ma.alūm

is burī tarah muñh se kyuuñ bāhar

aadmī kī zabāñ hai kyā ma.alūm

'josh' nūr-e-ḳhudā pe kyuuñ haavī

rang-e-rū-e-butāñ hai kyā ma.alūm

koi dara-e-jaan hai kya malum

ya faqat dastan hai kya malum

kya hudud-e-yaqin mein hai KHallaq

ya sarasar guman hai kya malum

aarzu thi KHuda ko ya hajat

kyun wajud-e-jahan hai kya malum

lahw ya KHud mein naqs ka ehsas

illat-e-ins-o-jaan hai kya malum

iztiraran ki baad-e-fikr-e-daqiq

KHilat-e-in-o-an hai kya malum

kis liye kis taraf bahar saat

raKHsh-e-hasti dawan hai kya malum

kis KHala-e-nazar ke bharne ko

ye zamin aasman hai kya malum

hai kahin aaftab-e-zat-o-sifat

ya shua-e-bayan hai kya malum

kuchh nahin hai ba-juz fareb yahan

aur sab kuchh wahan hai kya malum

kis liye aql ke safine mein

naql ka baadban hai kya malum

chaplusi mein kis liye mashghul

KHail-e-karrubiyan hai kya malum

malgajahaT si hai sar-e-gardun

abr hai ya dhuan hai kya malum

wo tawanai hai ki shaKHsiyyat

kaun shah-e-zaman hai kya malum

ban ke pichhe hai ek KHafi halchal

gard-e-pa karwan hai kya malum

shar hai kyun is qadar lahim-o-shahim

KHair kyun nim-jaan hai kya malum

shaitanat kyun hai rashk-e-mah-e-munir

kyun risalat katan hai kya malum

kaun said-e-gunah hai amdan

kyun jahannum tapan hai kya malum

kya hawadis ba-taur-e-mashghala hain

ya sar-e-imtihan hai kya malum

aur kyun imtihan ke chakkar mein

aalim-o-ghaib-dan hai kya malum

kaun in faqa-kash gharibon ka

zamin-e-ab-o-nan hai kya malum

aankhen labrez hain subu KHali

kaun pir-e-mughan hai kya malum

sikka-e-maut shahr-e-hasti mein

kis KHata par rawan hai kya malum

nafs-e-ammara baKHshne wala

hum se kyun sar-garan hai kya malum

kyun hamari zamin par har aan

karbala ka saman hai kya malum

is buri tarah munh se kyun bahar

aadmi ki zaban hai kya malum

'josh' nur-e-KHuda pe kyun hawi

rang-e-ru-e-butan hai kya malum