koi din zabt-e-ulfat ka natija dekh lete hain

koī din zabt-e-ulfat kā natīja dekh lete haiñ

agar chāho to ham ye bhī tamāshā dekh lete haiñ

hameñ dariyā meñ qatre kā nazar aanā bhī mushkil hai

magar ahl-e-nazar qatre meñ dariyā dekh lete haiñ

navāzish hai ki gāhe-gāhe aa jaate ho milne ko

koī din zindagī meñ ham bhī achchhā dekh lete haiñ

kabhī qatre meñ dariyā ko kabhī zarre meñ sahrā ko

ye zālim dekhne vaale bhī kyā kyā dekh lete haiñ

pashemānī to hotī hai hameñ inkār karne se

magar saaqī kā andāz-e-taqāzā dekh lete haiñ

asar dil par nahīñ hotā misāl-e-ā.ina lekin

hameñ jo kuchh dikhātā hai zamānā dekh lete haiñ

vaqār-e-zindagī meñ kuchh izāfa ho hī jaatā hai

kabhī jab ham tumhārā rū-e-zebā dekh lete haiñ

ḳhalish dil se kabhī zauq-e-junūñ kī miT nahīñ saktī

ham ab bhī ghar se uTh kar sū-e-sahrā dekh lete haiñ

baḌī raunaq hai ishq-o-husn kī mahfil meñ ai 'sāhir'

magar ham duur hī rah kar nazāra dekh lete haiñ

koi din zabt-e-ulfat ka natija dekh lete hain

agar chaho to hum ye bhi tamasha dekh lete hain

hamein dariya mein qatre ka nazar aana bhi mushkil hai

magar ahl-e-nazar qatre mein dariya dekh lete hain

nawazish hai ki gahe-gahe aa jate ho milne ko

koi din zindagi mein hum bhi achchha dekh lete hain

kabhi qatre mein dariya ko kabhi zarre mein sahra ko

ye zalim dekhne wale bhi kya kya dekh lete hain

pashemani to hoti hai hamein inkar karne se

magar saqi ka andaz-e-taqaza dekh lete hain

asar dil par nahin hota misal-e-aina lekin

hamein jo kuchh dikhata hai zamana dekh lete hain

waqar-e-zindagi mein kuchh izafa ho hi jata hai

kabhi jab hum tumhaara ru-e-zeba dekh lete hain

KHalish dil se kabhi zauq-e-junun ki miT nahin sakti

hum ab bhi ghar se uTh kar su-e-sahra dekh lete hain

baDi raunaq hai ishq-o-husn ki mahfil mein ai 'sahir'

magar hum dur hi rah kar nazara dekh lete hain