koi fihrist lafzon ki ya google ko khangalega

koī fihrist lafzoñ kī yā gōgle ko khañgālegā

vo merī chup se ab koī nayā matlab nikālegā

muqābil kar diyā us ke agar ā.īna maiñ ne to

zabāñ se zahr uglegā koī patthar uThā legā

mujhe ma.alūm hai us tak to ḳhālī ḳhat hī jā.egā

mirā qāsid hī dīmak ban ke lafzoñ ko uḌā legā

zarā dāman ko phailāyā ka.ī logoñ ne dukh Daale

maiñ samjhī thī koī hamdard mere ġham uThā legā

khaḌe the log sāhil par tamāshā dekhne vaale

maiñ ḳhush-fahmī meñ Duubī thī koī aa kar bachā legā

apāhij saarī duniyā hai koī andhā koī bahrā

koī māñge mire sapne koī āñkheñ churā legā

mujhe is dil ke zindāñ se hai behtar aañkh kā dariyā

Dubo.egā ye paanī gar to lāsheñ bhī uchhālegā

lab-e-sāhil to aate haiñ faqat kuchh ḳhol sīpoñ ke

jo gahrā.ī meñ jā.egā vahī gauhar nikālegā

kisī miTTī ko gūñdhegā kahīñ patthar tarāshegā

hunar hai us ke hāthoñ meñ na.ī 'fauzī' banā legā

koi fihrist lafzon ki ya google ko khangalega

wo meri chup se ab koi naya matlab nikalega

muqabil kar diya us ke agar aaina main ne to

zaban se zahr uglega koi patthar uTha lega

mujhe malum hai us tak to KHali KHat hi jaega

mera qasid hi dimak ban ke lafzon ko uDa lega

zara daman ko phailaya kai logon ne dukh Dale

main samjhi thi koi hamdard mere gham uTha lega

khaDe the log sahil par tamasha dekhne wale

main KHush-fahmi mein Dubi thi koi aa kar bacha lega

apahij sari duniya hai koi andha koi bahra

koi mange mere sapne koi aankhen chura lega

mujhe is dil ke zindan se hai behtar aankh ka dariya

Duboega ye pani gar to lashen bhi uchhaalega

lab-e-sahil to aate hain faqat kuchh KHol sipon ke

jo gahrai mein jaega wahi gauhar nikalega

kisi miTTi ko gundhega kahin patthar tarashega

hunar hai us ke hathon mein nai 'fauzi' bana lega