koi habib koi mehrban to hai hi nahin

koī habīb koī mehrbāñ to hai hī nahīñ

hamāre sar pe koī āsmāñ to hai hī nahīñ

jo ek aks-e-haqīqat hai TuuT jaa.e agar

pata chale ki jahāñ meñ jahāñ to hai hī nahīñ

maiñ ek umr se rab kī talāsh kartā huuñ

jahāñ pe us kā nishāñ thā vahāñ to hai hī nahīñ

har ek zulm ko chup-chāp sah rahe haiñ sabhī

ma.āshre meñ koī bā-zabāñ to hai hī nahīñ

ye ashk-e-ġham kā fasāna sunā ke mānegā

kisī bhī taur mirā rāzdāñ to hai hī nahīñ

karoge ishq to jānoge ġhaib ko 'kāfir'

har ek raaz hai zāhir nihāñ to hai hī nahīñ

koi habib koi mehrban to hai hi nahin

hamare sar pe koi aasman to hai hi nahin

jo ek aks-e-haqiqat hai TuT jae agar

pata chale ki jahan mein jahan to hai hi nahin

main ek umr se rab ki talash karta hun

jahan pe us ka nishan tha wahan to hai hi nahin

har ek zulm ko chup-chap sah rahe hain sabhi

maashre mein koi ba-zaban to hai hi nahin

ye ashk-e-gham ka fasana suna ke manega

kisi bhi taur mera raazdan to hai hi nahin

karoge ishq to jaanoge ghaib ko 'kafir'

har ek raaz hai zahir nihan to hai hi nahin