کوئی ہے محو عیش و طلب گار زندگی

کوئی ہے محو عیش و طلب گار زندگی

کوئی ہے شکوہ سنج و گراں بار زندگی

قسمت کی گردشوں سے زمانے کے جور سے

ہے زار حال زار گنہ گار زندگی

کچھ گول مول اس کی سدا چال ڈھال ہے

اک چال پر نہیں کبھی رفتار زندگی

زخمی ہوئے تھے پاؤں کہ دامن الجھ گیا

مشکل ہے رہ بہ وادیٔ پر خار زندگی

ہاں اے اجل زیادہ نہ مٹی خراب کر

زندان زندگی میں ہوں بیزار زندگی

تدبیر کچھ رہائی کی رنج و محن سے کر

تقدیر نے کیا ہے گرفتار زندگی

پنہاں ہیں خار کسوت گل میں ہزارہا

ہشیار دل فریب ہے گلزار زندگی

رشتہ نگاہ و فکر کا باقی نہ رکھ اجل

میرے بدن سے کھینچ لے زنار زندگی

بودم ز باد و خاک و بہشتم ہوا و حرص

اب ہوں بشیرؔ دور ز پیکار زندگی