koi haijaan isko kahta hai koi wijdan isko kahta hai

koī haijān is ko kahtā hai koī vijdān is ko kahtā hai

koī kahtā hai shā'irī hai 'abas koī imkān is ko kahtā hai

apnī apnī pasand hai sab kī apnā apnā hai sab kā zauq-e-suḳhan

vaah kahtā hai koī sun ke ġhazal koī hizyān is ko kahtā hai

hāsil-e-'umr ek shā'ir kā DeḌh do sau varaq kā majmū'a

koī dīvāna-pan samajhtā hai koī dīvān is ko kahtā hai

farq husn-e-nazar kā hotā hai ek motī ko dekhne meñ bhī

koī kahtā hai sang-reza ise koī marjān is ko kahtā hai

le ke phirte haiñ apne sar pe sabhī apne apne yaqīn kī chādar

koī kahtā hai gaa.e maatā hai koī haivān is ko kahtā hai

kaalā patthar hai jo 'aqīde kā sab ko miltā hai ye virāsat meñ

koī be-jān is ko kahtā hai koī bhagvān is ko kahtā hai

lauh-e-mahfūz ke musannif ne jo barā.e-bashar kiyā tahrīr

koī injīl is ko kahtā hai koī qur.ān is ko kahtā hai

ḳhuub durre paḌeñge 'vāsif' ko roz-e-mahshar daroġh-goī par

ek qatre kī baat hotī hai aur ye tūfān is ko kahtā hai

koi haijaan is ko kahta hai koi wijdan is ko kahta hai

koi kahta hai sha'iri hai 'abas koi imkan is ko kahta hai

apni apni pasand hai sab ki apna apna hai sab ka zauq-e-suKHan

wah kahta hai koi sun ke ghazal koi hizyan is ko kahta hai

hasil-e-'umr ek sha'ir ka DeDh do sau waraq ka majmu'a

koi diwana-pan samajhta hai koi diwan is ko kahta hai

farq husn-e-nazar ka hota hai ek moti ko dekhne mein bhi

koi kahta hai sang-reza ise koi marjaan is ko kahta hai

le ke phirte hain apne sar pe sabhi apne apne yaqin ki chadar

koi kahta hai gae mata hai koi haiwan is ko kahta hai

kala patthar hai jo 'aqide ka sab ko milta hai ye wirasat mein

koi be-jaan is ko kahta hai koi bhagwan is ko kahta hai

lauh-e-mahfuz ke musannif ne jo barae-bashar kiya tahrir

koi injil is ko kahta hai koi quran is ko kahta hai

KHub durre paDenge 'wasif' ko roz-e-mahshar darogh-goi par

ek qatre ki baat hoti hai aur ye tufan is ko kahta hai