koi har maraz ki dawa banTta hai

koī har maraz kī davā bāñTtā hai

ḳhulūs-o-mohabbat vafā bāñTtā hai

masīhā.ī par us kī qurbān jaao

maraz dene vaalā shifā bāñTtā hai

na dekhā hai jis ne kabhī apnā chehra

vahī shahr meñ ā.īna bāñTtā hai

samajhtā hai ḳhud ko jo bahlol-e-dānā

chalo chal ke dekheñ vo kyā bāñTtā hai

yahāñ kaun kyā kis ko detā hai har ik

muqaddar kā likkhā huā bāñTtā hai

ḳhudā jis ko taufīq de is jahāñ meñ

vahī dard-e-dil kī davā bāñTtā hai

'valī' us kī jādū-bayānī na pūchho

vo ḳhvāb-e-haqīqat-numā bāñTtā hai

koi har maraz ki dawa banTta hai

KHulus-o-mohabbat wafa banTta hai

masihai par us ki qurban jao

maraz dene wala shifa banTta hai

na dekha hai jis ne kabhi apna chehra

wahi shahr mein aaina banTta hai

samajhta hai KHud ko jo bahlol-e-dana

chalo chal ke dekhen wo kya banTta hai

yahan kaun kya kis ko deta hai har ek

muqaddar ka likkha hua banTta hai

KHuda jis ko taufiq de is jahan mein

wahi dard-e-dil ki dawa banTta hai

'wali' us ki jadu-bayani na puchho

wo KHwab-e-haqiqat-numa banTta hai