koi hunar to meri chashm-e-ashk-bar mein hai

koī hunar to mirī chashm-e-ashk-bār meñ hai

ki aaj bhī vo kisī ḳhvāb ke ḳhumār meñ hai

kisī bahār kā manzar hai chashm-e-vīrāñ meñ

kisī gulāb kī ḳhushbū dil-e-figār meñ hai

ajab taqāzā hai mujh se judā na hone kā

ki jaise kaun-o-makāñ mere iḳhtiyār meñ hai

nishān-e-rāh bhī Thahregā bārishoñ ke ba.ad

abhī ye naqsh kisī raah ke ġhubār meñ hai

ufuq ke aks kisī aa.ine meñ kyā simTīñ

ki shauq-e-jalva abhī apne intishār meñ hai

makāñ kī koī ḳhabar lā-makāñ ko kaise ho

safīr-e-rūh abhī jism ke hisār meñ hai

kamāl-e-zabt kī saa.at kahīñ guzar bhī jā

sitāra-e-shab-e-ġham mere intizār meñ hai

koi hunar to meri chashm-e-ashk-bar mein hai

ki aaj bhi wo kisi KHwab ke KHumar mein hai

kisi bahaar ka manzar hai chashm-e-viran mein

kisi gulab ki KHushbu dil-e-figar mein hai

ajab taqaza hai mujh se juda na hone ka

ki jaise kaun-o-makan mere iKHtiyar mein hai

nishan-e-rah bhi Thahrega barishon ke baad

abhi ye naqsh kisi rah ke ghubar mein hai

ufuq ke aks kisi aaine mein kya simTin

ki shauq-e-jalwa abhi apne intishaar mein hai

makan ki koi KHabar la-makan ko kaise ho

safir-e-ruh abhi jism ke hisar mein hai

kamal-e-zabt ki saat kahin guzar bhi ja

sitara-e-shab-e-gham mere intizar mein hai