koi ilzam mere nam mere sar nahin aaya

koī ilzām mere naam mere sar nahīñ aayā

vo jo tūfān andar thā mire bāhar nahīñ aayā

ye kis kī diid ne āñkhoñ ko bhar Daalā ḳhalā se yuuñ

ki phir āñkhoñ meñ koī dūsrā manzar nahīñ aayā

junūñ-bardār koī rū-e-sahrā par nahīñ dekhā

kanār-e-ābjū pyāsā koī lashkar nahīñ aayā

huī bārish daraḳhtoñ ne badan se gard sab jhāḌī

koī sāvan koī mausam mire andar nahīñ aayā

kahīñ pathrā ga.ī āñkheñ kahīñ shal hausloñ ke paañv

kahīñ rah-rau nahīñ pahuñchā kahīñ par ghar nahīñ aayā

kabhī kashtī pe koī bādbāñ maiñ ne nahīñ rakkhā

uḌānoñ ke liye merī koī shahpar nahīñ aayā

nahīñ ho kar bhī hai har saañs meñ shāmil muqābil bhī

magar zī-hosh kahte haiñ koī jā kar nahīñ aayā

koi ilzam mere nam mere sar nahin aaya

wo jo tufan andar tha mere bahar nahin aaya

ye kis ki did ne aankhon ko bhar Dala KHala se yun

ki phir aankhon mein koi dusra manzar nahin aaya

junun-bardar koi ru-e-sahra par nahin dekha

kanar-e-abju pyasa koi lashkar nahin aaya

hui barish daraKHton ne badan se gard sab jhaDi

koi sawan koi mausam mere andar nahin aaya

kahin pathra gai aankhen kahin shal hauslon ke panw

kahin rah-rau nahin pahuncha kahin par ghar nahin aaya

kabhi kashti pe koi baadban main ne nahin rakkha

uDanon ke liye meri koi shahpar nahin aaya

nahin ho kar bhi hai har sans mein shamil muqabil bhi

magar zi-hosh kahte hain koi ja kar nahin aaya