کوئی عشق میں جل گیا طور ہو کر

کوئی عشق میں جل گیا طور ہو کر

چڑھا دار پر کوئی منصور ہو کر

سراپا قرابت بنا جا رہا ہوں

ترے جام فرقت میں مخمور ہو کر

یہاں ایک صورت ہے نغمہ و آہ کی

جو نکلا ہے حسرت سے معمور ہو کر

تصور میں آنا تصور میں جانا

وہ نزدیک آئے بہت دور ہو کر

فسانۂ دل پوچھنے کو نہ آئے

رہا دل کا دل میں ہی مستور ہو کر

اٹھے آ رہے ہیں نگاہوں کے ساغر

کہیں پی نہ جاؤں میں مجبور ہو کر

بنا جا رہا ہوں گنہ گار اب پریمؔ

تری رحمتوں سے بہت دور ہو کر