koi jaane to kya jaane wo yakta hai hazaron mein

koī jaane to kyā jaane vo yaktā hai hazāroñ meñ

sitam-gāroñ meñ ayyāroñ meñ dil-dāroñ meñ yāroñ meñ

kisī kā dil to kyā shīsha na TuuTā bāda-ḳhvāroñ meñ

ye tauba TuuT kar kyoñ jā milī parhezgāroñ meñ

kahāñ hai duḳhtar-e-raz ai mohtasib ham bāda-ḳhvāroñ meñ

tire Dar se vo kāfir jā chhupī parhezgāroñ meñ

koī ġhuncha-dahan hañs kar hameñ ab kyā hañsā.egā

bahāreñ ham ne luuTī haiñ bahut aglī bahāroñ meñ

inhīñ logoñ ke aane se to maiḳhāne kī azmat hai

qadam lo shaiḳh ke tashrīf laa.e bāda-ḳhvāroñ meñ

vo katrā kar chale haiñ mai-kade se hazrat-e-zāhid

baḌe murshid haiñ hāthoñ haath laanā un ko yāroñ meñ

paḌā royā kare vo 'dāġh' bekas is tarah tanhā

ki jis kī rāt-din hañs-bol kar guzrī ho yāroñ meñ

koi jaane to kya jaane wo yakta hai hazaron mein

sitam-garon mein ayyaron mein dil-daron mein yaron mein

kisi ka dil to kya shisha na TuTa baada-KHwaron mein

ye tauba TuT kar kyon ja mili parhezgaron mein

kahan hai duKHtar-e-raz ai mohtasib hum baada-KHwaron mein

tere Dar se wo kafir ja chhupi parhezgaron mein

koi ghuncha-dahan hans kar hamein ab kya hansaega

bahaaren hum ne luTi hain bahut agli bahaaron mein

inhin logon ke aane se to maiKHane ki azmat hai

qadam lo shaiKH ke tashrif lae baada-KHwaron mein

wo katra kar chale hain mai-kade se hazrat-e-zahid

baDe murshid hain hathon hath lana un ko yaron mein

paDa roya kare wo 'dagh' bekas is tarah tanha

ki jis ki raat-din hans-bol kar guzri ho yaron mein