کوئی جب تک با خدا ملتا نہیں

کوئی جب تک با خدا ملتا نہیں

آدمی کو راستہ ملتا نہیں

دل کے اندر جھانک کر دیکھو ذرا

کون کہتا ہے خدا ملتا نہیں

ہیں نظر میں سیکڑوں چہرے مگر

پھول سا کوئی کھلا ملتا نہیں

ذہن کے سارے دریچے بند ہیں

دل کا دروازہ کھلا ملتا نہیں

کس قدر الجھی ہوئی ہے زندگی

ڈور کا کوئی سرا ملتا نہیں

سر تو دیکھے ہیں ترے در پر جھکے

دل مگر کوئی جھکا ملتا نہیں

ہر دوا ملتی ہے سنتا ہوں مگر

مرہم زخم صدا ملتا نہیں

اے صداؔ اتنے غموں کے باوجود

آنکھ میں آنسو بھرا ملتا نہیں