کوئی جیسے دریا پہ پیاسا نہیں

کوئی جیسے دریا پہ پیاسا نہیں

کتابیں تو ہیں پڑھنے والا نہیں

بظاہر بہت تیز ہے روشنی

مگر میرے گھر میں اجالا نہیں

مجھے یہ خیال آج کیوں آ گیا

کبھی اپنے بارے میں سوچا نہیں

سب اک دوسرے سے جڑے ہیں مگر

کسی کو کسی پر بھروسا نہیں

نگاہوں پہ ہیں ایسی پابندیاں

کہ اپنی طرف دیکھ سکتا نہیں

بہت بھیڑ ہے لیکن اس بھیڑ میں

کوئی مجھ کو چھو کر گزرتا نہیں

صدا دیجئے دستکیں دیجئے

وہ دروازہ اندر سے کھلتا نہیں

اسے میری شہرت سمجھ لیجئے

کسی نے مرا نام پوچھا نہیں

سمندر کو نظمیؔ برا کیوں کہو

تمہارا سفینہ تو ڈوبا نہیں