koi jalwa-fishan hai aur main hun

koī jalvā-fishāñ hai aur maiñ huuñ

tasavvur kā jahāñ hai aur maiñ huuñ

kaThin hai raah manzil gum shab-e-tār

magar azm-e-garāñ hai aur maiñ huuñ

ḳhizāñ kī anjuman meñ huuñ farokash

fareb-e-gulsitāñ hai aur maiñ huuñ

ye merā dil hai yā tasvīr-kHāna

jamāl-e-gul-ruḳhāñ hai aur maiñ huuñ

hamārā kārvāñ bhaTkā huā hai

ḳhayāl-e-kārvāñ hai aur maiñ huuñ

nazar meñ māvarā-e-farsh-o-arsh ab

fazā-e-do-jahāñ hai aur maiñ huuñ

mirā koī sharīk-e-ġham nahīñ hai

mirā dard-e-nihāñ hai aur maiñ huuñ

ta'assub hai kahīñ firqa-parastī

ajab nāzuk samāñ hai aur maiñ huuñ

shab-e-tārīk ke dāman meñ 'maġhmūm'

sukūt-e-bekarāñ hai aur maiñ huuñ

koi jalwa-fishan hai aur main hun

tasawwur ka jahan hai aur main hun

kaThin hai rah manzil gum shab-e-tar

magar azm-e-garan hai aur main hun

KHizan ki anjuman mein hun farokash

fareb-e-gulsitan hai aur main hun

ye mera dil hai ya taswir-kHana

jamal-e-gul-ruKHan hai aur main hun

hamara karwan bhaTka hua hai

KHayal-e-karwan hai aur main hun

nazar mein mawara-e-farsh-o-arsh ab

faza-e-do-jahan hai aur main hun

mera koi sharik-e-gham nahin hai

mera dard-e-nihan hai aur main hun

ta'assub hai kahin firqa-parasti

ajab nazuk saman hai aur main hun

shab-e-tarik ke daman mein 'maghmum'

sukut-e-bekaran hai aur main hun